أنا مش هتجوز غير ملتحى

انا مش هتجوز غير ملتحى

السلام عليكم ورحمة الله وبركاته

بدايةً الموضوع اللي هاتكلم فيه لا هو اجتهادى ولا كلام جديد، بس لاننا اللى بعدنا كتير وعمت البلوى: الموضوع اندثر وبقى اللى بيعمله يُصنف أمنياً انه من المطلوبين أو على الاقل المراقب تصرفاتهم، والناس بتبص له انه متشدد وانه انسان مظهرى وإن وإن .. كلام كتير هناقشه ان شاء الله ..

بس خليكم معايا واحدة واحدة ... :)

الأخت1 : هنتكلم عن اللحية ...

الأخت2 : ايه اللحية؟؟

الاخت1 : أيوة هى اللحية

الأخت2 : اشمعنى يعنى ؟

الاخت1 : أبداً اتقدم لى من كام يوم واحد ورفضته بسبب انه مش ملتحى

الأخت2 : ليه بس مش هو بيصلى وبيصوم واخلاقه كويسة؟

الاخت1 : نحسبه كذلك والله حسيبه

الأخت2 : امال ايه بقى؟؟ ليه ترفضيه هو حد لاقى حد كدة؟

الاخت 1 : زى ما كنت هرفضه لو بردو بيصلى واخلاقه كويسة بس مدخن لان التدخين حرام

والتدخين حكمه مستنبط بينما اللحية حكمها ثابت ومعروف

الاخت 2 : ايوة بس اللحية مش فرض ومجرد مظهر

الاخت1 : مين قال انها مش فرض؟ اللحية فرض " واجبة "

الأخت2 : نعم؟؟؟ دى سنة مش فرض

الاخت1 : لا ، اجماع علماء الامة على انها فرض وان حلقها حرام دة غير الاحاديث النبوية الصحيحة اللى بنوا عليها كلامهم

الأخت2 : فين دليلك؟؟

الاخت1 : دليلى اولا : من القرآن الكريم الله عز وجل يقول فى سورة الحشر (وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا وَاتَّقُوا اللَّهَ إِنَّ اللَّهَ شَدِيدُ الْعِقَابِ )

وقوله عز وجل فى سورة النجم مخبراً عن النبى صلى الله عليه وسلم (وَمَا يَنطِقُ عَنِ الْهَوَى إِنْ هُوَ إِلَّا وَحْيٌ يُوحَى )

وبالتالى كل ما يخبرنا به النبى صلى الله عليه وسلم هو بوحى وأمره لابد أن يطاع

فقد قال تعالى (وَأَطِيعُواْ اللّهَ وَالرَّسُولَ لَعَلَّكُمْ تُرْحَمُونَ)

وقال ( وَإِن تُطِيعُوهُ تَهْتَدُوا )

وطاعة النبى صلى الله عليه وسلم هى طاعة لله عز وجل

وقال الله تعالى فى سورة النور (فَلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ )

وعليه فقد أمر النبى صلى الله عليه وسلم باعفاء اللحية وورد هذا الامر بخمس صيغ مختلفة ( أعفوا ، أوفوا ، أرخوا ، أرجوا ، وفروا ) اللحى .. ومعناها كلها تركها على حالها وعدم حلقها

وثبت عن بن عمر رضى الله عنهما ان النبى صلى الله عليه وسلم أمر باحفاء الشوارب ، وإعفاء اللحى ) رواه مسلم

وعن ابى هريرة رضى الله عنه قال رسول الله صلى الله عليه وسلم ( جُزُّوا الشوارب ، وأَرخوا اللحى ، وخالفوا المجوس )

ولما رأى النبى صلى الله عليه وسلم رسولى كسرى وقد حلقا لحاهما ، وأعفيا شواربهما ، كره ان ينظر اليهما ، وقال : " ويلكما من أمركما بهذا ؟ " ، قالا : " أمرنا بهذا ربنا " يعنيان كسرى ، فقال رسول الله صلى الله عليه وسلم : " ولكن ربى أمرنى بإعفاء لحيتى وقص شاربى )

ياااااااه بقى أنا أتزوج واحد النبى قال له ويلك ولم ينظر إليه بسبب حلقه للحيته؟؟

دة غير ان فى صحيح مسلم ان اعفاء اللحية من سنن الفطرة

وهى ايضا سمت الانبياء والرسل فنجد فى القران الكريم فى سورة طه (قَالَ يَا ابْنَ أُمَّ لَا تَأْخُذْ بِلِحْيَتِي وَلَا بِرَأْسِي )

وكمان حلق اللحية تغيير وتبديل لخلق الله

فكما ورد بسورة النساء ( وَلآمُرَنَّهُمْ فَلَيُغَيِّرُنَّ خَلْقَ اللّهِ وَمَن يَتَّخِذِ الشَّيْطَانَ وَلِيًّا مِّن دُونِ اللّهِ فَقَدْ خَسِرَ خُسْرَانًا مُّبِينًا)

الله عز جل خلق الرجل بلحية وهو دة سمته وصورته فبالتالى لما يحلقها وهو مأمور بتركها ومنهى عن حلقها يبقى غيّر خلق الله

ومعروف ان النساء هن اللى مش ليهم لحية وبالتالى لما بيحلقها بيكون متشبه بهن .

وقد قال بن عباس رضى الله عنهما : " لعن رسول الله صلى الله عليه وسلم المتشبهين من الرجال بالنساء ، والمتشبهات من النساء بالرجال ) رواه البخارى

الأخت2 : طيب وايه اقوال المذاهب والفقهاء؟

الاخت1 : المذاهب فيها اجماع بتحريم حلق اللحية

عندك المذهب الحنفى قال فى "الدر المختار" يحرم على الرجل قطع لحيته وصرح فى النهاية بوجوب قطع ما زاد عن القبضة ، اما الاخذ منها وهى دون ذلك كما يفعله بعض المغاربة ومخنثة الرجال فلم يبحه أحد ، وأخذ كلها فعل يهود الهند ومجوس الاعاجم "

نشوف المذهب المالكى .. قال فى "التمهيد" ويحرم حلق اللحية ، ولا يفعله الا المخنثون من الرجال"

وقال القرطبى " لا يجوز حلق اللحية ولا نتفها ولا قصها "

والمذهب الشافعى ... هنجد ان الامام الشافعى فى كتاب " الام" نص على تحريم حلق اللحية

المذهب الحنبلى .. قال السفارينى فى "غذاء الالباب" ( المعتمد فى المذهب حرمة حلق اللحية )

دى المذاهب الاربعة

نيجى مثلا للمذهب الظاهرى هنجد " ابن حزم " بيقول فى مراتب الاجماع ( واتفقوا ان حلق اللحية مُثلة لا تجوز)

وقد( نهى رسول الله صلى الله عليه وسلم عن النُهبى والمُثلة ) رواه البخارى

والمثلة : التشويه

ولذلك قال ابن عساكر عن عمر بن عبد العزيز رحمه الله انه قال : " إن حلق اللحية مُثلة ، وان رسول الله صلى الله عليه وسلم نهى عن المُثلة )

دة غير شيخ الاسلام بن تيمية قال ( يحرم حلق اللحية للاحاديث الصحيحة ولم يبحه أحد )

الأخت2 : بس يمكن العلماء دول قالوا كدة علشان العصر مختلف انما حاليا الدنيا تطورت والحياة اتغيرت

الاخت1 : الله شرعه ودينه يصلح لكل زمان ومكان و الدين لا تتغير احكامه وتشريعاته مع الزمن

وكمان خلينا نشوف مع بعض فتاوى واقوال علماء معاصرين فى موضوع اللحية دة

قال الشيخ عبد الجليل عيسى فى كتابه ما لايجوز فيه الخلاف بين المسلمين ( حلق اللحية حرام عند الجمهور ، مكروه عند غيرهم )

وقال الشيخ على محفوظ رحمه الله فى كتابه الابداع فى مضار الابتداع ( اتفقت المذاهب الاربعة على وجوب توفير اللحية وحرمة حلقها والاخذ القريب منه )

وقال المحدث الالبانى رحمه الله فى آداب الزفاف بعد ان ساق ادلة تحريم حلق اللحية ( مما لا ريب فيه عند من سلمت فطرته ، وحسنت طويته ، أن كلا من الادلة سالفة الذكر كاف لاثبات وجوب اللحية وحرمة حلقها ، فكيف بها مجتمعة!!)

وقال الشيخ ابو بكر الجزائرى ( واما اللحية فيوفرها حتى تملأ وجهه وترويه لقوله صلى الله عليه وسلم " جزوا الشوارب وأرخوا اللحى " وقوله " خالفوا المشركين أحفوا الشوارب وارخوا اللحى " بمعنى وفروها وكثروها فيحرم بذلك حلقها )

أيضا نجد فى كتاب فقه السنة للشيخ سيد سابق وهو عالم ازهرى قال التالى فى باب خصال الفطرة فى الحاشية (حمل الفقهاء هذا الأمر على الوجوب وقالوا بحرمة حلق اللحية بناء على هذا الأمر)

دة غير فتاوى اللجنة الدائمة للبحوث العلمية والارشاد برئاسة الشيخ بن باز رحمه الله ( بتحريم حلقها وتحريم مهنة حلاقتها )

وافتى بدة كمان الشيخ ابو بكر الجزائرى بتحريم حلقها وبالتالى تحريم مهنة حلاقة اللحية

الأخت2 : الكلام دة اول مرة اعرفه !!

الاخت1 : الموضوع مش هين زى ما البعض متصوره تخيلى ان الحليق بترد شهادته؟؟

قال ابو حامد الغزالى فى الاحياء : ( ورد عمر بن الخطاب رضى الله عنه ، وابن أبى يعلى قاضى المدينة شهادة من كان ينتف لحيته )

وفى الفقه المالكى ان من تعمد حلقها يؤدب ، وترد شهادته

الأخت2 : انا ما كنتش مفكرة الموضوع بالاهمية دى واحيانا يعنى كنا بنسخر من الملتحين !!

الاخت1 : طبعا دة غلط من عدة وجوه

اولا ان الاية الكريمة بتقول .. ( أَيُّهَا الَّذِينَ آمَنُوا لَا يَسْخَرْ قَومٌ مِّن قَوْمٍ عَسَى أَن يَكُونُوا خَيْرًا مِّنْهُمْ )

وكمان السخرية من الملتحى بسبب لحيته هو سخرية من امر شرعى مثبت امر بيه النبى صلى الله عليه وسلم أكثر من مرة وباكثر من صيغة وفى أكثر من مناسبة

وعليه قال النسفى فى متن العقائد ( الاستهانة بمسائل الدين كفر ، والاستهزاء بمسائل الشريعة أيضا كفر )

وقال الشيخ عبد الرحمن عبد الخالق ( الاستهزاء باعفاء اللحية او الصلاة او الحجاب الشرعى للمراة او المسجد او الكعبة او الرسول هو كفر بالله تبارك وتعالى ، فكل ما ينسب الى الله من أمر ونهى وذات الاستهزاء به والاعتراض عليه هو كفر ونقص ايمان ، واعنى بالذات ما ينسب الى الله من شرع الكعبة والمسجد والمصحف ، فالاستهزاء بالمسلم لاسلامه كفر ، ولا يتاتى هذا من مسلم ابدا)

قال الله تعالى عن الكفار فى سورة المطففين (إِنَّ الَّذِينَ أَجْرَمُوا كَانُواْ مِنَ الَّذِينَ آمَنُوا يَضْحَكُونَ وَإِذَا مَرُّواْ بِهِمْ يَتَغَامَزُونَ )

وقال تعالى فى سورة التوبة (يَحْذَرُ الْمُنَافِقُونَ أَن تُنَزَّلَ عَلَيْهِمْ سُورَةٌ تُنَبِّئُهُمْ بِمَا فِي قُلُوبِهِم قُلِ اسْتَهْزِؤُواْ إِنَّ اللّهَ مُخْرِجٌ مَّا تَحْذَرُونَ وَلَئِن سَأَلْتَهُمْ لَيَقُولُنَّ إِنَّمَا كُنَّا نَخُوضُ وَنَلْعَبُ قُلْ أَبِاللّهِ وَآيَاتِهِ وَرَسُولِهِ كُنتُمْ تَسْتَهْزِؤُونَ لاَ تَعْتَذِرُواْ قَدْ كَفَرْتُم بَعْدَ إِيمَانِكُمْ إِن نَّعْفُ عَن طَآئِفَةٍ مِّنكُمْ نُعَذِّبْ طَآئِفَةً بِأَنَّهُمْ كَانُواْ مُجْرِمِينَ )

وقال تعالى فى سورة البقرة (زُيِّنَ لِلَّذِينَ كَفَرُواْ الْحَيَاةُ الدُّنْيَا وَيَسْخَرُونَ مِنَ الَّذِينَ آمَنُواْ )

فالامر مش سهل والتهاون فيه غلط

وزى ما انا رافضة انى اتجوز واحد بيدخن لانه حرام

بالرغم ان حكمها استنباطى فما بالك حكم حلق اللحية اللى ورد فيها اوامر واجمع الجمهور على تحريم حلقها؟

على الاقل السجاير ذنب متقطع وممكن ما يجاهر بيه

انما الحليق ذنب دائم ومجاهر بالذنب وفى حديث النبى صلى الله عليه وسلم ان كل أمتى معافى الا المجاهرين

فنسأل الله العفو والعافية ونسال الله الثبات

الأخت2: طب يعني هو في حد كامل ؟ أي حد عنده حاجات مقصر فيها ، لما يكمل كل حاجة وميبقاش فاضل غير اللحية يبقى يلتحي

الأخت1: ومين اللي ركب الطاعات على بعضها كدة؟

دة ربنا بيقول: ((فاتَّقُوا اللَّهَ مَا اسْتَطَعْتُمْ))، يعني اعمل كل اللي تقدر عليه..

ممكن الأخ يكون مش بيقدر يصوم نوافل ولا يقيم الليل وبيرتكب معاصى زى التدخين و سماع أغاني ومشاهدة أفلام، لكنه يقدر يسيب لحيته طاعة لله، يبقى ليه يحرم نفسه من ثواب الطاعة ويزود معاصية معصية كمان؟؟ مين قال إن الملتحي لازم يبقى كامل في كل الجوانب؟

دي عبادة منفصلة اللي يقدر يعملها لازم يعملها وملهاش دعوة بأي عبادة تانية..

هو لو واحد بيدخن وبيسمع أغاني ينفع يقول: (خلاص، مش هاصلي ولا هاصوم لحد ما أبطل البلاوي اللي باعملها دي)؟ مينفعش طبعا؛

لأن العبادات والطاعات مش مترتبة على بعضها.. بالعكس، الواحد لما يبقى مقصر في جانب لازم يقوي جدا كل الجوانب التانية اللي يقدر عليها عشان إيمانه يزيد بيها يقوم يقدر يتغلب على تقصيره

الأخت2 : طب يعني هما كل الملتحين ملتزمين بجد؟ ماهو في ناس ملتحين وأخلاقهم مش كويسة وإلتزامهم صوري

الأخت1 : هو أنا قلت إن اللحية هي المعيار الوحيد؟

اللحية عامل أساسي أيوة، لكن مش معنى كدة إن أي ملتحي يبقى ملتزم أساساً، لازم نشوف باقي الجوانب.. بالظبط زي لو جه شخص أخلاق عالية وعائلة محترمة وبيصلي وملتحي كمان لكن بيدخن مثلا سجاير وشيشة: هل دة مناسب؟

او ملتحى ومش بيدخن لكن مش بيصلى هل دة مناسب؟؟

اللحية محور أساسي في الإلتزام لكنها مش المحور الوحيد، في محاور تانية كتير وكلها مطلوبة ومفيش خلاف عليها، عشان كدة تنبيهي على اللحية لأن هي اللي مظلومة حاليا رغم أهميتها ...

اخى المسلم :

آن لك أن تقيم الدين كله ولا تقسمه الى قشر ولب فالدين شامل والبيعة لا تتجزأ ،

اقيموا دولة الاسلام فى نفوسكم حتى يمكن الله لنا فى الارض ونقيم دولة الاسلام فى كل مكان

لا تكن مظهرياً وتنسى باطنك واصلاحه

ولا تردد : المهم صلاح الباطن.. فلو صلح الباطن لصلح الظاهر

اختى المسلمة :

لا تتهاونى ، ولا تقبلى بانصاف الملتزمين

لا تترددى فى رفض من يتهاون فى فروض وواجبات الاسلام ولا يفعلها تقصيراً او بسبب حجج واهية

اللى يقول هيحلق اللحية علشان خايف من الامن .. يبقى بيخاف ومع اول مشكلة ممكن تتعرضوا لها يقولك اخلعى نقابك او يرفض ان ابنائه يلتزموا بالسمت والهدى النبوى خوفاً عليهم من المشاكل والامن والمضايقات

اللى يقول علشان شغلى ممنوع فيه اللحية .. قولى له وَفِي السَّمَاء رِزْقُكُمْ وَمَا تُوعَدُونَ

واللى يتنازل فى امر ربنا علشان خاطر مال ومتاع دنيا وعرض زائل يبقى مش هيكون امين عليكِ ولا دة اللى هيوصلك للفردوس الاعلى .

واللى يقولك اصلها مش مهمة اوى المهم الباطن والقلوب .. تبقى كارثة لانه مستهين باوامر النبى الصريحة ولانه بيعتبر ان الاسلام امر بامور تافهة !!

ومعاذ الله ان يكون الاسلام امر باى شئ تافه بل كلها أمور لصلاح الفرد والمجتمع وتوصل جميعها لطاعة الرحمن وطريق الجنان .

اللى يقولك علشان مصلحة الدعوة ونكون شكلنا قريب من الناس .. قولى له: ما فرط رسول الله قط ولا ميع الدين ولا تنازل وما عليك الا البلاغ والله عليه النتائج..

اللي بيهدي الناس هو ربنا مش احنا، ومش من مصلحة الدعوة إننا أول ناس نخالفها، نقول للناس: (أطيعوا الله وأطيعوا الرسول) ونكون احنا أول ناس بنعصاهم..

ربنا اللي أمرنا بالدعوة هو اللي أمرنا باللحية، وهو اللي قال: (يا أَيُّهَا الَّذِينَ آمَنُواْ عَلَيْكُمْ أَنفُسَكُمْ لاَ يَضُرُّكُم مَّن ضَلَّ إِذَا اهْتَدَيْتُمْ)، وقال: (إِنْ عَلَيْكَ إِلَّا الْبَلَاغُ)

.. فاحنا مطلوب نبلغ الدعوة فقط مع إلتزامنا بها، استجاب الناس أو لم يستجيبوا دي مش شغلتنا،

قال الله: (إِنَّمَا أَنتَ مُنذِرٌ وَلِكُلِّ قَوْمٍ هَادٍ)، وقال: (إِنَّكَ لَا تَهْدِي مَنْ أَحْبَبْتَ وَلَكِنَّ اللَّهَ يَهْدِي مَن يَشَاء )

واللى يقولك انى من غيرها بكسر الحاجز النفسى بينى وبين الناس ويستجيبوا ليا لما أدعوهم ... قولى له ربنا أمرك باللحية ولما هيسألك عنها وتقوله عذرك دة هيقولك انا أمرتك وفرضت عليك اللحية ولم أفرض عليك استجابة الناس لك ... انت ملزم بالتبليغ وغير ملزم بالنتائج

اللى يقولك اصلى مش متعود على شكلى فيها وشكلى هيكون وحش

قولى سبحان ربى دة اللحية زينة الرجل هل تقبل انك ما تستخدم الطيب والبرفان؟؟ هى زينة وكانت السيدة عائشة تقول والذى زين الرجال باللحى

دة غير انه بفرض شكله هيكون وحش ... افعلها لله وكفى

افعلها لله وهو القادر انه يزينك ويجملك فى عين نفسك وفى عين زوجك

وحتى لو شكلك وحش: إنت مش بتعملها بنية الزينة، أنت بتعملها طاعة وعبادة

ألا يكفى أن تفعلها طاعة وامتثال لأوامر الله عز وجل وأوامر نبيك صلى الله عليه وسلم؟؟

ألا يكفى أن تتبع هديه وهدى جميع الأنبياء والرسل عليهم السلام؟؟

ألا يكفى أن تفعلها دفاعاً عنه وعن هديه صلى الله عليه وسلم؟؟

نسأل الله أن يهدينا ويهدى جميع المسلمين ويرينا الحق حقاً ويرزقنا اتباعه ويرينا الباطل باطلاً ويرزقنا اجتنابه